Jan
Oosterhof hoolt zich, naost muziek, ok doende mit et schrieven van
allerhaande krabbels. Zo is Jan al weer een jaor of wat vaaste mitwarker an
de Stellingwarver Spreukekelinder. Hi'j schrieft hierveur jaorliks een
twaelftal riemels en kotte gedichten. Ok tekent hi'j veur disse kelinder
sund 2000 twaelf strips van 'Piere en Slakke'. Hierover - en over ere
schrieveri'je - meer op disse pagina en veerder.
Willen jow wel es wat waark bekieken? Op de pagina 'daelelaeden'
is d'r zat te kriegen, hielemaole ommenocht!
Stellingwarver Spreukekelinder
Al
weer een stokmennig jaoren schrieft Jan veur de Stellingwarver
Spreukekelinder. Meerst gaot et daorbi'j om, zoas hi'j et zels nuumt,
riemelderi'je. Kotte vassies, die neffens Jan zels eins niet et predikaot
'gedicht' hebben meugen. Mar die daoromme niet minder aorig bin om es te
lezen. Vaeks bin et riemels mit humor. Now en dan zit d'r alderdeegst ok wel
een riemel mit inhoold tussen (misschien daj' dŕt dan een gedichien numen
meugen).
De Stellingwarver Spreukekelinder bestedet ommedaenken an et stellingwarfs
op alderhaande menieren. Zo kuj' op elk kelinderblattien wat biezunders
lezen. Op 'e veurkaante is dat alle keren een stellingwarver spreuke of
uutdrokking. Op de aachterkaanties vien jow de gedichies van Jan en ere
schrievers, mar ok wetensweerdigheden uut de netuur, de stellingwarver
historie of de steerns.
Drievende kracht aachter disse kelinder - en dat mag ok wel es zegd wodden -
is Sietske Bloemhoff.
nikszeggend vassien
ik zeg
mar zo
ik zeg
mar
Krentiesbri'j
Van
Jan Oosterhof is in 2002 een boekien verschenen, dat de titel 'Kentiesbri'j'
dreegt. Hierin bin een stokmennig riemels en strips uut
bovennuumde kelinder te vienen. Veerder staon d'r een peer liedteksten in en
vanzels ok et neudige ni'je materiaol.
'Krentiesbri'j' is te koop bi'j de Stellingwarver Schrieversronte, bi'j de
boekhaandels in Wolvege en Oosterwoolde. Mar jow kun et ok bi'j Jan
persoonlik bestellen ŕ 6,50 euro (+ 2 euro verzendkosten). Dat is weer een
kwestie van et sturen van een
mailtien.
Jow kriegen dan een signeerd exemplaor toestuurd.
Krentiesbríj, waetergruwel...
Da's toch van dat ondefineerbere spul, daj' meestentieds in zoen pak kriegen
kunnen? Is dat spul wel lange hooldber, je?
En hoe zit dat dan mit dat boekien?
Oh: búten de koelkaast beweren! Juust, en et zit dan zeker ok niet in zoen
pak?
Piere en
Slakke
Zoas al an et begin van disse pagina meld: Piere en Slakke bin
stripfiguren, die aj' vienen kunnen op de Stellingwarver Spreukekelinder.
Op 1 september 2007 is van disse beide kammeraoden een stripboekien
verschenen. Aj' daor belang bi'j hebben (kosten bin mar 7,50), dan kuj' et kopen in de boekwinkels in Wolvega en
Oosterwolde of vanzels bi'j Jan zels. Kwestie van even een
mailtien sturen! In dat leste
geval kommen d'r wel verzendkosten bi'j, mar daorveur hej' dan ok een
signeerd exemplaor!
Piere en Slakke bin twie alderaorigste beesten. Ze hebben now en dan wel wat
ofwi'jd praot, heur teksten bin niet altied lieke zinnig. Mar dat mag de
pret niet drokken! Ze hebben een goed kerakter, en kieken now en dan
ommeraek verfrissend tegen de wereld an.
Op de pagina 'daelelaeden'
kuj' een riegel van de tot now toe verschenen strips daelelaeden in jow computer.
Dat bin wi'j dus!
Musicals wodden in et basisonderwies nog jaorliks speuld. Veural in groep 8.
Dat hoeft niet altied van Benny Vreeden of Jingo te kommen, heur! Een
stellingwarfse musical is ok wel es aorig. Jan schreef d'r ok iene speciaol
veur de kasttied. Een eigentiedse uutvoering van et kastverhael!
Musical
Wat
begon in de tied dat Jan nog naor de Pedagogische Academie gong, wodde in de
eerste jaoren as onderwiezer wieder uutbreidet: musicals schrieven. Veur de
kiender uut zien eigen groep bi'jveurbield. Et veurdiel van zels een musical
schrieven is, daj' alle kiender van de klasse een rol toebedelen kunnen. Et
is trouwens allemaole begonnen mit et schrieven van onneuzele lieties over
van alles en nog wat, tegere mit kammeraod Frank.
In 1985 wun Jan mit de musical 'Keuning Hum is uut zien hum' de
Oolde-Pookpries, een anvieteringspries veur et schrieven in et stellingwarfs.
Misschien ligt daor eins wel et begin van dat hiele stellingwerfse geschrief.
'Kastverhael, anno now' is een kastmusical. In de jaoren dat Jan onderwiezer
was in Ni'jehooltpae was et de gewoonte, dat de kiender van de hoogste
groepen rond de kastdaegen een musical speulden veur de oolderen van et
dorp. En now en dan ok wel daorbuten. Et 'Kastverhael anno now' is daor een
veurbield van. Et vertelt eins et originele kastverhael, mar dan toch ok
weer niet. Hier gien Jozef en Maria, mar Yoesoef (asielzuker) en Margje die
op pad zullen naor Bartlehiem...
Ach
ja, Huus en Hiem... Kwam daor ok niet riegelmaotig iene "B" veurbi'j? Dat
was een bekende Nederlaander, die graeg anoniem blieven wol, is et niet?
Hadde die man niet een accent?
Radio
Een jaor of wat (in de 90-er jaoren) prissenteerde Jan now en dan op
zundag et stellingwarfse radiopergramme 'Huus en Hiem'. Naost et dri'jen van
muziek draefde daor vanzels steevaast de vaaste mitwaarker 'B' op. 'B' wol
hiel graeg
anoniem blieven, vandaor alliend de anduding. Veur de oplettende luusterder
was de geliekenis mit een niet naoder te numen lid van et koninklik huus
opvalend. 'B' het hiel wat onderwaarpen bi'j de kop had. Ok schreef
Jan now en dan een column veur dit radiopergramme. Zowel van de bi'jdregen
van "B" as van de columns van Jan bin d'r op de pagina 'daelelaeden'
veurbielden te vienen.
Kiek en gniffel mar es even.
Jan
schrieft ok teksten die internationaol bin. Et betreft dan in de riegel
zonuumde "tussenteksten", die hanteerd wodden ter overbrogging tussen
bi'jgelieks couplet en refrein. Ok kommen we ze
vaeks tegen an et aende van een lietien. Een veurbield van zoen
internationaole tekst: lalalala.
Liedteksten
D'r
bin in de loop der jaoren al hiel wat liedteksten uut de printer van Jan
roegelt. Veur et grootste pat hebben we et dan over cabarateske teksten,
lieties mit een knipoge. Daor zit d'r ok wel es iene tussen, waorvan aj'
daenken kunnen: 'moet dat now zo?'. Et antwoord op die vraoge is simpel:
nee, et moet niet...mar et kan wel.
Ok het Jan in de loop der jaoren een stokmennig luusterlieties schreven.
Lieties mit een serieuzere toon, zuwwe mar zeggen. En dan bin d'r vanzels
nog de lieties die in opdracht schreven binnen, en daoromme altied over een
bepaold onderwaarp gaon. Veurbielden daorvan bin de lieties uut de revue's
die Jan schreef. Zoas bi'jgelieks veur de Tuundorpschoele, doe die 75 jaor
beston. Of veur 'The Flying Stars' die vanuut een bepaold thema warkten. Et
begon allemaole in de jaoren '80, doe Jan diel uutmaekte van dit
cabaretgezelschop. Hoewel de naeme eers vermoeden
dot , speulde dit
gezelschop in die tied heufdzaekelik in et Stellingwarfs. Jan schreef veur
disse cabaretgroep niet alliend liedteksten en composities (o.e. bi'j
teksten van Harmen Houtman), mar ok sketches.
De liedteksten van Jan bin diels weeromme te vienen op de
'daelelaedpagina'.
